Hvernig lifir maður tjónið? | RÚV

Trúarbrögð eru þar kostur og kemur þá að síðari vangaveltunni sem nefnd var í upphafi. Hvernig skyldi það vera að sofa hjá guði? Sjálfur sá ég alltaf heilagan anda fyrir mér sem heldur óáþreifanlega persónu, ekki beinlínis fola ástarlífsins heldur meira eins og sönnun í stærðfræði, formúlu sem einhvern veginn kveður á um að þegar parabóla í öðru veldi mætir ófyrirséðu hnitakerfi þar sem sem talnaþrenndir, skurðpunktar, láréttir fletir, hornréttur og tvinntölur leiða ávallt að tveimur kostum eða útkomum: annað hvort teiknast í hnitakerfinu þekkjanlegt andlit Elvis Presleys, eða pin númerið er afhjúpað sem opnar genitískt aðgengi að framleiðslu messíasarbarns.

Björn Þór Vilhjálmsson um Segulskekkju Soffíu Bjarnadóttur via Hvernig lifir maður tjónið? | RÚV.

Arngrímur Vídalín um Karítas

Andlegt ofbeldi er ríkjandi þáttur í samskiptum þeirra systra og alltaf er Karitas undirokuð, niðurlægð og höfð að engu. Raunar er persóna Bjarghildar svo einvíð í illmennsku sinni að það jaðrar við fáránleika. Hún er hreint út sagt ekki sérlega trúverðug persóna, þótt Vigdís Hrefna Pálsdóttir túlki hana eins ágætlega og efni standa til. Ofbeldið sem Karitas er beitt og þau sálrænu áhrif sem það hefur á hana er óhugnanlegt á að horfa.

via Óreiða á sviði – DV.

Ljóðræn sýn inn í hugarheim araba – DV

Um fimmtíu skáld frá arabaheiminum eiga ljóð í bókinni, um þriðjungur konur. Flest koma skáldin frá fyrrverandi nýlendum Frakka í Norður-Afríku: Marokkó, Alsír og Túnis. En nokkur skáldanna koma frá Líbíu, Egyptalandi, Írak, Sýrlandi og Líbanon.

Það er ljóst að innsýn í fjölbreyttan hugarheim arabískra skálda getur haft áhrif á hina einvíðu mynd sem Íslendingum birtist oft af þessum heimshluta. „Eins og við verðum vör við í fréttunum á hverjum degi þá er víða skelfilegt ástand í þessum heimshluta, þar sem menn drepa hverjir aðra undir yfirskini trúar. Það eru hins vegar ekki nein merki um svoleiðis ofstopa í bókinni.“

via Ljóðræn sýn inn í hugarheim araba – DV.

Útgáfufagnaður – Hálfsnert stúlka – Bjarni Bjarnason

Hálfsnert stúlka er ný skáldsaga eftir rithöfundinn Bjarna Bjarnason og er gefin út af Veröld. Í tilefni af útgáfu hennar verður létt og skemmtileg samkoma í Eymundsson í Austurstræti,efri hæð, þriðjudaginn 28.október kl. 17.00.

Bjarni mun segja stuttlega frá tilurð bókarinnar og vinkona okkar hún Ingibjörg Þórisdóttir, leikkona og kennslustjóri Listaháskóla Íslands, les valda kafla.

Léttar veitingar í boði.

via Útgáfufagnaður – Hálfsnert stúlka – Bjarni Bjarnason.

Yfirgengilega gáfulegt um Kötu | DR. GUNNI

Hlustaði á gríðarlega gáfulegar umræður um bókina KATA eftir Steinar Braga í Gufunni í gær. Mig langar að lesa þessa bók enda eru fyrri bækur Steinars „skemmtilegar“. Eftir því sem fólkið röflaði meira um bókina langaði mig þó alltaf minna til að lesa hana því þetta var svo yfirgengilega gáfulegt – eins og keppni í speki, mjög fyndið. Steinar Bragi nær alltaf að búa til sterka og þrúgandi söguramma, en svo er ekkert endilega víst að hann nái að plotta sig í mark. Góður David Lynch-ari engu að síður. Kaupi Kötu pronto.

via Gamall og gáfaður | DR. GUNNI.

KOK : OPNUN / ÚTGÁFUHÓF -Kristín Eiríksdóttir sýnir í Rennunni

Laugardaginn 25. októbber kl. 16.00 kl fagnar Kristín Eiríksdóttir útgáfu bókarinnar KOK sem kemur út undir merkjum JPV. Jafnframt opnar hún sýningu á teikningum í Rennunni og býður ykkur að koma við, þiggja léttar veitingar og hlýða á lestur úr bókinni.

Kristín Eiríksdóttir er myndlistarmenntaður rithöfundur. Fyrsta bókin hennar Kjötbærinn, kom út árið 2004. Á eftir fylgdu svo ljóðabækurnar Húðlit Auðnin árið 2006 og Annarskonar sæla árið 2008. Árið 2010 kom út smásagnasafnið Doris deyr og haustið 2012 sendi hún frá sér sína fyrstu skáldsögu, Hvítfeld – fjölskyldusaga. Hún hefur einnig skrifað tvö leikrit: Karma fyrir fugla ásamt Karí Ósk Grétudóttur, sem frumsýnt var í Þjóðleikhúsinu í febrúar 2013 og Skríddu sem sett var upp í Borgarleikhúsinu í apríl 2013.

Auk þess að sinna ritstörfum hefur Kristín tekið þátt í samsýningum og sett upp gjörninga í samstarfi við Ingibjörgu Magnadóttur, bæði hér heima og erlendis. Sögur hennar og ljóð hafa verið þýdd yfir á dönsku, þýsku og ensku. Kristín býr í Reykjavík.

via KOK : OPNUN / ÚTGÁFUHÓF -Kristín Eiríksdóttir sýnir í Rennunni.

Hallgrímur Helgason og Eggert Stefánsson : Herðubreið

Eins er það nú, þegar hann ofl. hafa unnið leikgerð útfrá verkinu hans, Konan við 1000 gráður, þá fer þessi ógnarlegi markaðssetningarskriðdreki á stað með drunum og dynkjum, yfirgnæfir allt annað og nær til sín athyglinni svo að með ódæmum er.

Ekki efa eg að þetta nýja verk hans þarsem Guðrún S. Gísladóttir fer áreiðanlega frábærlega með sitt erfiða hlutverk, sé vel heppnað leikhúsverk. Það er hin hliðin á þessum peningi, að þetta efni er svo „heavy“, að eg efa að aðsókn að því verði veruleg. En það skiptir hann litlu máli. Hann hefur náð sínu fram – og það er Schram-fólkinu alveg nægjanlegt.

via Hallgrímur Helgason og Eggert Stefánsson : Herðubreið.

Aþena, Ohio – Karolina Fund

Fyrir 20 árum bjó ég í amerískum smábæ sem hét þessu skemmtilega nafni. Um tveggja ára skeið sendi ég Rás 2 útvarpspistla um daglegt líf Íslendings í þessu samfélagi, sem oft kom spánskt fyrir sjónir og stangaðist í veigamiklum atriðum á við það sem hann átti að venjast úr heimahögunum. Pistlarnir urðu 77 talsins og fjalla um allt milli himins og jarðar, en ævinlega frá sjónarhóli hins þjóðrækna Íslendings sem veit eins og er að „Ísland er land þitt”.

Nú hef ég hug á að gefa þessa pistla út á bók, því ég hef grun um að margir hefðu gaman af að rifja upp þau viðhorf og þá atburði sem þeir lýsa. Þetta er bókin Aþena, Ohio.

via Aþena, Ohio – Karolina Fund.

Listaverk úr bókum

Þegar skapandi fólk kemur saman eða fær innblástur hvort frá öðru er aldrei að vita hvað getur gerst. Nemendur í myndmennt heimsóttu bókasafnið nýverið og fengu að velja sér ónothæfar bækur fyrir listaverk. Bækurnar eru orðnar gamlar og úreltar en krakkarnir gáfu þeim fallegt framhaldslíf með því að búa til skemmtileg bókverk.

via BB.is – Frétt.

Viðvarandi ósönnuð sekt

SP: Í stað þess að allir séu saklausir uns sekt er sönnuð – frasi sem reyndar getur gefið til kynna viðvarandi ósannaða sekt – eru allir þarna á milli: ef til vill sekir. Hins vegar má sjá nafnið sem spurningarmerki eða beinlínis andstöðu við það hvernig kerfið og hin félagslegu norm skilgreina sektina. Er glæpamaðurinn í raun sekur? Um hvað? Og hvers er skilgreiningarvaldið?

S: Seinasta árið höfum við verið að vinna að tengdum hugmyndum en þó í sitthvoru lagi. Þegar við ákváðum að sýna verkin okkar saman sáum við að þó þau tengist ekki öll undir einni þematískri regnhlíf fléttast þau saman á fínlegan hátt. Við höfðum bæði verið að pæla mikið í glæpum og refsingu – og einnig vinnu. Þessi þrjú stef voru sérstaklega áberandi og nafnið nær að halda utan um verkin sem heild þó að það feli ekki í sér beina tilvísun í hvert og eitt þeirra.

Snorri Páll Úlfhildarson Jónsson og Steinunn Gunnlaugsdóttir í viðtali via Gagnsleysi, sekt og guðleg refsing – DV.

Ingvi Þór Kormáksson skrifar um Stundarfró

Arinbjörn lifir á frægð sem hann hlaut fyrir sína fyrstu, og hingað til einu, ljóðabók en hefur ekki getað komið stafkrók á blað síðan. Hann lifir á snöpum frá útgefanda sínum og íhlaupakennslu. Örlög hans ráðast í Borginni við sundin eins og örlög fleiri ungra íslenskra skálda á fyrri tíð.

Þetta er afskaplega lipurlega rituð bók, sannkallaður skemmtilestur. Það er gott flæði í textanum. Ein hugmynd tengist annarri á átakalausan hátt og ný sjónarhorn verða til.

via Bókmenntir.is – 1989 – Stundarfró eftir Orra Harðarson í umfjöllun Ingva Þórs Kormákssonar.

Höfundakvöld “Konurnar á kantinum” í BMM!

Í tengslum við hátíðina “Konurnar á kantinum” (Women on the edge) sem fram fer hér á landi á nokkrum stöðum í vikunni, er blásið til höfundakvölds á kaffihúsinu Súfistanum í Bókabúð Máls og menningar.

Dagskráin hefst kl. 20 og þær sem koma fram eru Mette Karlsvik (NO), Kristín Ómarsdóttir (IS) og Maja Lee Langvad (DK) sem einblína á prósa.

Seinni hluti dagskrárinnar er tileinkuð ljóðlistinni og koma þá þar fram Inger Elisabeth Hansen NO), Sigurbjörg Þrastardóttir (IS), Olga Ravn (DK) og Kristín Eiríksdóttir (IS).

Dagskráin er opin öllum og aðgangur er ókeypis.

Verið hjartanlega velkomin

via (1) Höfundakvöld “Konurnar á kantinum” í BMM!.

Friðrik Erlingsson: Ginnungagap í siðmenningu Íslands

Orsök þess að íslenskar sjónvarpsseríur skortir sannfæringu, er annar skortur: Skortur á siðmenningu. Við áttum siðmenningu á miðöldum, svo komu 3-400 ár af niðurlægingu, hafís, eldgosum, ömurleika, hungri, pestum, einangrun, vosbúð og vesöld, en það eru aðstæður þar sem siðmenning fær ekki þrifist. Svo urðum við sjálfstæð og snögglega moldrík og síðan sigruðum við heiminn, alveg þangað til við duttum á rassinn.

Og nú höfum við risið upp að nýju eins og ofurskrímsli í annars flokks hryllingsmynd sem fær ekki drepist, sama hvað reynt er. Og þá förum við að semja glæpasögur og framleiða glæpaseríur líkt og við búum í morðóðu glæpasamfélagi milljónaþjóðar, sneisafullu af geðsjúklingum – því auðvitað erum við milljónaþjóð með þúsund ára menningarsögu að baki, er það ekki? Nei, það er ekki svo. Raunveruleg menningarsaga okkar nær varla aftur að aldamótunum 1900. Fyrir þann tíma var ginnungagap í siðmenningu okkar og menningarsögu, alveg aftur til þess tíma að höfundur Njálu setti punktinn við verk sitt. Þetta er sorglegt – og það er erfitt að horfast í augu við það – en svona er það samt.

via Viðhorf | Íslensk sjónvarpsþáttagerð – Danmörk: 14 – Ísland: 2 | Klapptré.

Rannsóknarstofa um framúrstefnu – „„Við erum hinir nýju menn nýs lífs“: Yfirlýsingar, gagnmenning og alþjóðleg framúrstefna“

Benedikt Hjartarson, dósent í almennri bókmenntafræði og menningarfræði við Háskóla Íslands, heldur fyrirlestur í Hafnarhúsi sem unnin er í samvinnu við Rannsóknarstofu um framúrstefnu við Háskóla Íslands.

Í evrópskri menningarsögu er tímabilið frá 1909 til 1938 gjarnan kennt við sögulega framúrstefnu og þar með vísað til hreyfinga eins og ítalsks fútúrisma, rússnesks kúbó-fútúrisma, súrrealisma, kúbisma og konstrúktívísma. Í fyrirlestrinum verður fjallað um nýjar rannsóknir á sögulegu framúrstefnunni, sem leitast við að varpa ljósi á eðli starfsemi hennar og draga fram áður lítt þekktar hreyfingar eða efnivið. Í fyrsta lagi verður sjónum beint að nýjum rannsóknum á bókmenntagrein manifestósins eða stefnuyfirlýsingarinnar og hvernig þær varpa nýju ljósi bæði á sérstöðu þessara hreyfinga og alþjóðlega útbreiðslu hinnar nýju fagurfræði. Í öðru lagi verður fjallað um nýrri fræðiskrif sem lagt hafa grunn að nýrri staðfræði alþjóðlegrar framúrstefnu og fela í sér endurskoðun á hefðbundnum hugmyndum um samband miðju og jaðarsvæða. Í þriðja lagi verða þessar nýju kenningar um staðfræði framúrstefnunnar kannaðar frá gagnrýnu sjónarhorni og þeirri spurningu velt upp, að hvaða marki þær halda fast í rannsóknarramma fræðilegrar hefðar sem takmarkar fremur en eykur skilning fræðimanna á viðfangsefninu. Í því samhengi verður áhersla lögð á mikilvægi breiðs sögulegs sjónarhorns á þær hugmyndir um þjóðfélagslega byltingu, menningarlega endurlífgun og andlega umbreytingu sem liggja verkefni hennar til grundvallar.

via Rannsóknarstofa um framúrstefnu – „„Við erum hinir nýju menn nýs lífs“: Yfirlýsingar, gagnmenning og alþjóðleg framúrstefna“.

Rýni: Listilega leikið með tímaleysi minninga

Strax á fyrstu blaðsíðum bókarinnar er varpað fram vangaveltum um yfirborðskennd einkenni tímans og verða þau eitt mikilvægasta þema verksins. Þegar ljóðmælandinn fer í fyrsta skipti að heimsækja afa sinn á hjúkrunarheimili er hjallur í bakgarðinum þar sem verið er að þurrka þorskhausa. Hverfulleiki lífsins og endanleg hrörnun okkar allra er sýnd í gegnum þessa fiskhausa, sem „minna skáldið á helgrímur“ og verða birtingarmynd alls þess sem hann þarf að horfast í augu við þegar kemur að veikindum afans.

Alexandra Eyfjörð skrifar um Alzheimertilbrigðin via Rýni: Listilega leikið með tímaleysi minninga.

Höfundakvöld í Gunnarshúsi – Kristín og Sverrir

Húsráð Gunnarshúss mun standa fyrir vikulegum Höfundakvöldum í Gunnarshúsi fram að jólum. Á hverju fimmtudagskvöldi mæta tveir höfundar og spjalla um bækur sínar, lesa aðeins úr þeim, og síðan gefst áhorfendum kostur á að spyrja líka. Meiningin er að lyfta jólabókavertíðinni aðeins upp úr fari hinna hefðbundnu upplestrarkvölda, og gefa hverri bók og hverjum höfundi meiri tíma.

Á fimmtudaginn 23. október mæta þau Kristín Steinsdóttir og Sverrir Norland og svara spurningum Höllu Þórlaugar um bækur sínar, skáldsöguna Kvíðasnillingana (SN) og Vonarlandið (KS). Allir velkomnir á meðan stólar leyfa, aðgangur 500 kr.

via Höfundakvöld í Gunnarshúsi – Kristín og Sverrir.

Konurnar á kantinum

Velkomin á Konurnar á kantinum – árleg hátíð. Á “Kantinum” hátíðinni hittir þú fyrir rithöfunda, sýningarlistamenn og tónlistarmenn sem nýta sér gamlan efnivið á nýjan hátt.

19.00. NORDISK MESTERMØTE:

Poetene Olga Ravn (DK), Kristín Eiríksdóttir (IS), Kristín Ómarsdóttir (IS), og Inger Elisabeth Hansen (NO) leser egne tekster

20.00. PERFORMANCE:

Áfall/Trauma

Angela Rawlings (CA/IS)

20.15 PERFORMANCE:

Svingninger i krop, temperatur – jord

Jessie Kleemann (GL/DK)

20.45 FORFATTERSAMTALE

“Hun er vred.” Maja Lee Langvad (DK) í samtali við Kristínu Ómarsdóttur (IS)

21.45 KONSERT

Cryptochrome (IS)

Það er ókeypis á hátíðina, þökk sé stuðningi frá Kulturkontakt Nord, Norsk kulturråd, Norsk forfattersentrum og Statens kunstråd i København.

via Konurnar á kantinum.

Grettisfærsla – alþýðumenningu skilað til fólksins – erindi – rapp – sópran

Félag íslenskra fræða efnir til rannsóknarkvölds þar sem Bjarki Karlsson flytur erindið „Grettisfærsla – alþýðumenningu skilað til fólksins“ en Blaz Roca og Hallveig Rúnarsdóttir frumflytja þuluna við tóna Hilmars Arnar Hilmarssonar.

Bjarki segir frá hinni blautlegu miðaldaþulu, Grettisfærslu, tortímingu hennar, endurheimt og nú síðast endurgerð í alþýðlegan búning. Hann reifar sögu kvæðisins, bragfræði og vinnubrögð við endurgerðina.

Grettisfærsla hafði verið hulin í 400 ár vegna siðvandra manna sem máðu út texta á þremur skinnbókarsíðum svo tryggilega að engin leið var að lesa. Ólafur heitinn Halldórsson náði þó að vinda að mestu ofan af ritskoðuninni árið 1959 með lestri af myndum, teknum undir útfjólubláu ljósi. Hinn endurheimti texti er býsna slitróttur á köflum en þó eru í honum heillegir partar, nóg til þess að grunur manna um að textinn hafi verið máður út sökum þess hve ósiðlegur hann var fékkst rækilega staðfestur. Þrátt fyrir að kvæðið megi teljast afar sérstakt, bæði sjálfs sín vegna og varðveislu sinnar, hefur það lítt verið á dagskrá fræðimanna síðan Ólafur svipti af því hulunni og ekki fyrr en nú ratað aftur inn í þá alþýðumenningu sem það virðist vera sprottið úr.

Sterk líkindi eru með Grettisfærslu og kveðkap Erps Eyvindarsonar – BlazRoca –, hvort heldur litið er til formgerðar eða efnistaka. Bjarki leitaði því til Erps um að semja inn í eyðurnar sem Ólafur Halldórsson náði ekki að lesa. Í fyrirlestrinum greinir hann frá samstarfi sínu við rapparann og hvernig þeir sameinuðust um viðeigandi nálgun á viðfangsefninu til að gera kvæðinu sem sanngjörnust skil þó að ýmsu þurfi að hnika til og prjóna við svo að það verði að samfelldum texta. Og að sjálfsögu verður lagið frumflutt.

via Grettisfærsla – alþýðumenningu skilað til fólksins – erindi – rapp – sópran.

Útgáfuboð bókarinnar Öræfi eftir Ófeig Sigurðsson – Hlemmur Square, fimmtudaginn 23. október kl. 17

„Sagt er að jökullinn skili sínu, það sem hann eitt sinn gleypi komi um síðir í ljós aftur.“

Kætist með okkur kæru vinir! Við fögnum magnaðri nýrri skáldsögu Ófeigs Sigurðssonar, Öræfi, á Hlemmur Square fimmtudaginn 23. október kl. 17.

Léttar veitingar í boði og allir velkomnir!

Vorið 2003 kemur ungur maður örmagna og blóðugur inn í Þjónustumiðstöðina í Skaftafelli eftir hrakninga á öræfum. Hann heitir Bernharður Fingurbjörg, austurrískur örnefnafræðingur, og erindi hans til landsins var að halda í rannsóknarleiðangur inn á Vatnajökul og vitja um vettvang hroðalegs glæps sem framinn var tuttugu árum fyrr og beindist meðal annars að móður hans.

Á köflum er þessi bók nokkurs konar sálumessa yfir Íslandi. Þetta er magnaður óður um öræfi landsins, öræfi mannssálarinnar og öræfi íslenskrar menningar. Hér skiptist á fjarstæðukennt grín og kraftmikil ádeila og allt vitnar um djúpa tilfinningu höfundar fyrir íslenskri náttúru og mannlífi gegnum aldirnar.

Ófeigur Sigurðsson hefur hlotið mikið lof fyrir bækur sínar og fékk Skáldsaga um Jón (2010) meðal annars Bókmenntaverðlaun Evrópusambandsins.

via Útgáfuboð bókarinnar Öræfi eftir Ófeig Sigurðsson – Hlemmur Square, fimmtudaginn 23. október kl. 17.

Afstýrum verkfalli tónlistarkennara « Silfur Egils

Ég ætla ekki að trúa því upp á sveitarfélögin í landinu að þau láti viðgangast að tónlistarkennarar fari í verkfall sem gæti orðið langt og strangt. Verkfallið á að hefjast á miðvikudaginn.

Því tónlistarkennarar hafa kannski ekki ýkja mikinn slagkraft í verkfalli – það gerist jú ekki annað en að börn og unglingar missa af spilatímum og tímum í tónfræði.

En gleymum því ekki að tónlistarkennslan í landinu er afar verðmæt. Hún hefur orðið þess valdandi að Íslendingar – sem áttu sama og enga tónlist á árum áður – eru nú mikil tónlistarþjóð. Tónlistin ber hróður okkar víða um álfu – ekkert bætir heldur geð landans eins og hún.

via Afstýrum verkfalli tónlistarkennara « Silfur Egils.

Sigurður Guðmundsson: „Hugmyndin er óskaplega ofmetið fyrirbæri“

„Ég er hugmyndafælinn maður,“ segir Sigurður. „Í sköpunarferlinu reyni ég að sleppa því sem kallað er hugmynd, án þess þó að gera bara eitthvað. Hugmyndin er óskaplega ofmetið fyrirbæri. Fólk í myndlistarnámi segist oft vanta hugmyndir, en hugmynd er ekki upphaf neins heldur verkfæri fyrir eitthvað annað sem liggur á bak við hana. Það sama á við í viðskiptum, blaðamennsku, landbúnaði eða ástarlífinu. Hugmynd er gagnlegt verkfæri en hún er í þjónustu þess sem er undanfari hennar. Þar er mitt vinnusvið og þar eyði ég mestum tíma, en úr þeirri vinnu kemur hins vegar ekkert sjáanlegt.“

via „Hugmyndin er óskaplega ofmetið fyrirbæri“ – DV.

Tilnefnd til Augustverðlaunanna 2014

Í hádeginu í dag var tilkynnt um þá sem tilnefndir eru til virtustu bókmenntaverðlauna Svía, sem kennd eru við August Strindberg. Þar á meðal eru höfundar sem birst hafa á íslensku, svo sem Steve Sem-Sandberg, höfundur Fátæklinganna í Lodz, sem kom út fyrir nokkrum árum – nú er hann tilnefndur fyrir bók sem heitir Hinir útvöldu (De utvalda) sem er líkt og fyrrnefnda bókin svokallaður nasistadoðrantur. Þá er Ida Börjel tilnefnd fyrir ljóðabókina Ma – en ljóð eftir hana hefur birst á Starafugli – og Sara Stridsberg er tilnefnd fyrir bókina Beckomberga, en Sara vann fyrir fáeinum árum Bókmenntaverðlaun Norðurlandaráðs fyrir bókina Draumadeildin (Drömfakulteten) sem heyrðist reglulega á tímabili að væri rétt óútkomin á íslensku áður en hún bara gufaði upp.

Frekari upplýsingar hér (á sænsku):Dessa har nominerats till Augustpriset 2014 | Augustpriset.

Útgáfureif: HAFNFIRÐINGABRANDARINN

Útgáfureif Hafnfirðingabrandarans fer fram á Kexinu (salnum inn af veitingastaðnum) á miðvikudaginn 22. október frá 17-19. Það er búið að panta Nirvana köku og 90’s skreytingar erlendis frá. Þá má geta þess að playlisti hefur verið í smíðum í marga daga inni á Spotify.

Hafnfirðingabrandarinn er líklegast gamansaga með dramatísku ívafi. Hún gerist árið 1999. Hún ætti að henta vel lesendum á aldrinum 14-50 ára (og öllum þessu þroskuðu börnum sem eru yngri – og frábæra fólki sem er eldra). Hugmyndin er sem sagt sú að sagan geti tilheyrt hinum svokallaða Young Adult-flokki, sem þykir vera mjög töff erlendis … held ég.

Sagan er skrifuð af einskærum áhuga á félagslegu raunsæi en líka á dramatískri söguframvindu (en áhuginn á drama ýkist enn frekar undir áhrifum koffíns). Kannski er sagan fyrst og fremst skrifuð af áhuga á kaffi og súkkulaði. Og svo líka baráttu hvers og eins fyrir gæfuríku lífi – sem ógæfan vill þó svo gjarnan vera partur af.

Þá má nefna að sagan kemur inn á ýmis ómissandi menningarfyrirbæri, mörg frá tíunda áratugnum, á borð við þættina „Að hætti Sigga Hall“, Austin Powers, Vaxtalínuna, Bee Gees, Maltesers, uppblásin húsgögn, Nirvana, formúluna fyrir flatarmál hrings sem er radíus hringsins sinnum radíus aftur sinnum pí, Gísla sögu Súrssonar, Titanic, Kleppara, Stöngina inn, Lúxusís með lakkrísbragði, Fjarðarkaup, Lindu-buff, Súfistann, Hafnarborg, All-Bran og Bráðavaktina – allt mjög áhugavert.

Í reifinu verður boðið upp á gúmmelaði og áfengi, glow-sticks og glæsileg plaggöt af Hanson, Ace of Base og Jet Black Joe, úr Æskunni og ABC, svo eitthvað sé nefnt.

via (2) Útgáfureif: HAFNFIRÐINGABRANDARINN.

Míkhaíl Shíshkín spjallar um Bréfabókina

Rússneski rithöfundurinn Míkhaíl Shíshkín, höfundur skáldsögunnar Bréfabókar sem er að koma út hjá Bjarti, heimsækir Reykjavík í næstu viku. Áslaug Agnarsdóttir þýddi bókina úr rússnesku.

Þriðjudaginn 21. október bjóða Bjartur, rússneskan í Háskóla Íslands og Reykjavík Bókmenntaborg UNESCO lesendum að hitta skáldið. Dagskráin verður á efri hæð Sólon í Bankastræti kl. 17 og eru allir hjartanlega velkomnir.

Þarna gefst færi á að hlusta á Shíshkín ræða um verk sín, spjalla við skáldið og kynnast Bréfabók hans. Bókin verður til sölu á staðnum og geta áhugasamir lesendur fengið áritun hjá höfundinum.

via Míkhaíl Shíshkín spjallar um Bréfabókina – Bókmenntaborgin.

STEF setur fjarskiptafyrirtækjum afarkosti | RÚV

STEF hefur gefið Símanum, Tali og 365 frest til miðvikudags til að svara því hvort þau ætla að loka á aðgang sinna notenda að torrent-vefsíðunum deildu.net og Pirate Bay. Héraðsdómur Reykjavíkur úrskurðaði í síðustu viku að sýslumaður skyldi setja lögbann á aðgang notenda Vodafone og Hringdu.

Höfundaréttarsamtökin bíða þess nú að sýslumaður, sem áður hafði hafnað lögbanni, taki lögbannskröfuna gegn Vodafone og Hringdu fyrir á ný. Í framhaldi af úrskurði héraðsdóms skoraði STEF á Símann, Tal og 365 að fylgja fordæminu og loka fyrir aðgang sinna notenda.

via STEF setur fjarskiptafyrirtækjum afarkosti | RÚV.

Listasafn Íslands opnar undirdeild með videolistaverkum

Listasafn Íslands opnaði á 130 ára afmæli sínu þann 16.október nýja undirdeild, Vasulka-Stofu, og mun hún hýsa gagnasafn vídeólistamannanna, Steinu og Woody Vasulka. Vasulka-Stofa verður jafnframt miðstöð rafmiðlalista á Íslandi.

Með opnun stofunnar beinir Listasafn Íslands athygli að varðveislu vídeólistar sem hefur hingað til skort á. Sem höfuðsafn á sviði myndlistar gegnir Listasafn Íslands lykilhlutverki í varðveislu íslenskrar myndlistar og á það ekki síður við um vídeóverk og margmiðlunarlist en þá list sem unnin er með eldri tækni. Deildarstjóri Vasulka-Stofu er Kristín Scheving.

via miðjan.is – Listasafn Íslands opnar undirdeild með videolistaverkum.

Sveinn Yngvi Egilsson: Skáld og rómantík

Nú­tíma­skáld­in, og þá á ég við skáld á 20. öld og fram á okk­ar daga, varpa svo lands­lag­inu inn á við og yrkja um hug­ar­heima. Þetta greini ég einna helst hjá Gyrði Elías­syni. Þá erum við kom­in í mjög hug­læga nátt­úru og kort­lagn­ingu sál­ar­lífs­ins út frá lands­lags­hug­tök­um sem er mjög for­vitni­legt fyr­ir­bæri. Um leið hef­ur Gyrðir, og ýmis önn­ur nú­tíma­skáld, mjög næma til­finn­ingu fyr­ir um­hverf­inu. Ljóðmæl­end­ur Gyrðis eru oft á gangi en gang­an er áber­andi fyr­ir­bæri í evr­ópskri róm­an­tík, og þetta út­fær­ir Gyrðir á sinn hátt. Hann er alls ekki hrein­ræktaður róm­an­tíker en mér finnst samt merki­legt að sjá hvað göngu­hefðin er sprelllif­andi í ljóðum hans.

Sveinn Yngvi Egilsson, höfundur bókarinnar Nátt­úra ljóðsins – Um­hverfi ís­lenskra skálda , spjallar við Kolbrúnu Bergþórsdóttur via Skáld og rómantík – mbl.is.

Ágúst Einarsson um virðisaukaskatt á bókum

Þrep virðisaukaskatts hérlendis eru þrjú talsins, það er 0%, 7% og 25,5% en það síðastnefnda er hið almenna virðisaukaskattsþrep. Bækur og annað ritað mál eru í svokölluðu lægra þrepi sem er 7%. Hins vegar er margvísleg starfsemi undanþegin virðisaukaskatti og er þannig í 0% þrepi. Þetta er til að mynda starfsemi eins og heilbrigðisþjónusta, rekstur skóla og safna, íþróttastarfsemi, póstþjónusta, vátryggingar, bankaþjónusta, ferðaskrifstofur, útfarar- og prestþjónusta og sala laxveiðileyfa.

via Vísir – Afnema á virðisaukaskatt á bókum.

Ásgeir H. Ingólfsson: Útlensk bókajól

Ég man að það var stundum erfitt að fylgjast með jólabókaflóðinu úr fjarlægð í gamla daga, þegar næsta íslenska bókabúð var í meira en þúsund kílómetra fjarlægð. En þeir dagar eru auðvitað liðnir, enda minnsta mál í heimi að kaupa bara rafbókina með einum smelli þótt maður sé staddur í útlöndum.

Hefði maður haldið. En þegar maður leitar af rafbókum hjá eBaekur.is, Eymundsson.is eða Forlagid.is þá finn ég ekki Englaryk, ég finn ekki Kötu, ég finn ekki  Segulskekkju, ég finn ekki Kvíðasnillingana, ég finn ekki Manninn sem hataði börn, ég finn ekki Stundarfró – ég finn engar af þeim íslensku bókum sem ég þó veit að eru komnar út á pappír.

via Útlensk bókajól | Menningarsmygl.

Bryndís Björgvinsdóttir: „Allar góðar bækur fjalla um það hvílíkur bömmer það er að vera manneskja.“ : TMM

Það eru nokkrir sagnamenn í föðurfjölskyldu minni og pabbi er einn þeirra. Mamma heldur því fram að hann sé „fastur í fortíðinni“ en það er meðal annars sú fortíð sem ég reyni að taka fyrir í verkinu Hafnfirðingabrandarinn sem út kemur á haustmánuðum 2014. Við mamma vitum ekki af hverju pabba finnst svona gaman að tala um fortíðina en kannski er hann þunglyndari en hann heldur. Og þá vísa ég til hins melankólíska ástands sem sálgreinandinn Sigmund Freud lýsti í ritgerðinni Trauer und Melancholie, en þar hélt hann því fram að melankólískur tregi væri önnur hlið sorgarferilsins, þar sem fólk lítur svo á að sátt við missi séu einskonar „svik“ við hin glötuðu viðföng.4 Í stað þess að horfa fram á veginn þá dvelur fólk við það sem var. Það er líka ágæt lýsing á pabba, en ég veit annars lítið um þunglyndi, og kannski er pabbi einfaldlega sagnamaður í eðli sínu. En hvað er það þá, að vera sagnamaður? Af hverju er sumt fólk endalaust að segja sögur af atburðum sem tilheyra fortíðinni? Hvað er á því að græða?

Bryndís Björgvinsdóttir skrifar um nýja bók sína, Hafnfirðingabrandarinn via „Allar góðar bækur fjalla um það hvílíkur bömmer það er að vera manneskja.“ : TMM.

„Bókin er ástarbréf til sjö ára Guðna“

Leitin að Blóðey er ævintýrabók þar sem afi segir barnabarni æsilega sögu sem hann fullyrðir að sé sönn. Höfðuðu ævintýrasögur mikið til þín þegar þú varst barn? „Já, þessi bók er eiginlega ástarbréf til sjö ára Guðna. Þetta er bókin sem ég hefði verið meira en til í að lesa sjálfur á þeim tíma. Það var ekkert of mikið úrval af svona sögum en ætli ég hafi ekki verið ellefu ára þegar ég lagði í Hringadrottinssögu fyrst og las hana til enda. Hún og Hobbitinn, ásamt Benjamín dúfu og fleiri bókum, voru mínar uppáhaldsbækur.“

via Vísir – Bókin er ástarbréf til sjö ára Guðna.

Leikræn tjáning – Karolina Fund

Leikræn tjáning nýtist á margan hátt og allsstaðar þar sem fólk kemur saman hvort heldur í skólastarfinu, leiklistarnámskeiðum áhugaleikfélaga eða jafnvel bara á ættarmótinu. Leikræn tjáning er í raun æfingabanki sem inniheldur fjölbreyttar æfingar í leikrænni tjáningu. Má þar nefna leiki, upphitunaræfingar, spuna, persónusköpun, látbragðsleik, leikhússlagsmál, trúðaleik og boltakast. Fjölmargar myndir er tengjast æfingunum prýða bókina.

Höfundur bókarinnar er Elfar Logi Hannesson, leikari og stofnandi Act alone einleikjahátíðarinnar og Kómedíuleikhússins. Elfar Logi hefur kennt leiklist um land allt síðustu tvo áratugi. Leikræn tjáning verður sannarlega kærkomin mörgum því mjög lítið er til af kennsluefni um leikræna tjáningu á Íslandi.

via Leikræn tjáning – Karolina Fund.

Kveðja frá Sofi Oksanen « Forlagið

Ég sendi líka íslenskum kollegum mínum kveðju sem lesandi þeirra. Ég verð alltaf stolt þegar ég sé íslenskar bækur í bókabúðum stórþjóða. Ég er viss um að dæmi Íslands gagnast öðrum smáþjóðum í baráttunni við bókaútgefendur stórþjóða sem eru oft smeykir við að kaupa bækur frá litlum málsvæðum til útgáfu. Íslendingar hafa sýnt að smáar þjóðir geta skapað sterka menningu sem fólk getur skilið og notið um víða veröld.

via Kveðja frá Sofi Oksanen « Forlagið – vefverslun.

Freyja Gunnlaugsdóttir um kjarabaráttu tónlistarkennara

Ein af meginástæðum þess að íslenska tónlistarskólakerfið er eins sterkt og raun ber vitni er sá mannauður sem starfar innan skólanna. Menntunarstig stéttarinnar er hátt og nemendur hafa aðgang að færustu sérfræðingum á sínu sviði. Í fáum öðrum löndum kenna leiðandi hljóðfæraleikarar þjóðarinnar á framhaldsstigi og allt niður í grunnstig. Það er gríðarlega mikilvægt að þessi hópur haldi áfram að kenna og miðla áfram dýrmætri þekkingu og reynslu. Þau eru mikilvægar fyrirmyndir fyrir þá kynslóð tónlistarmanna sem er að vaxa úr grasi. Það er ekki hægt að ætlast til að sérfræðingar sinni kennslu í sjálfboðavinnu, hvorki í tónlist né öðrum greinum.

via Vísir – Kjarabarátta tónlistarkennara.

Köttum verður ekki smalað » Borgríki 2: kvikmyndagagnrýni

Mér var boðið á frumsýningu íslensku myndarinnar Borgríki 2.  Til að gera langa sögu aðeins styttri má segja að myndin sé svona dæmigerð íslensk mynd.  Fín hugmynd sem gufar upp í lélegu handriti og slöppum leik.  Svo má auðvitað ekki gleyma takmörkuðu „production value“.   En kannski er ég aðeins of neikvæður.  Það voru alveg nokkrir dauðir punktar í henni sem má tala vel um.  Það var t.d. ekkert hlé á þessari mynd.  Sem er gott því þá komst ég fyrr heim.  Ég keypti líka ekkert popp og kók sem þýðir að ég fitna minna.  Þetta er allt stórir plúsar.

via Köttum verður ekki smalað » Borgríki 2: kvikmyndagagnrýni.

Saga eftirlifenda – Karolina Fund

Þriðja og síðasta bókin, Saga eftirlifenda: Níðhöggur, er þétt og löng (um 570 bls.), og því er framleiðslukostnaðurinn ansi hár. Hinar tvær bækurnar, Höður og Baldur og Heljarþröm, eru nánast uppseldar og nauðsynlegt er að endurprenta þær — þá fyrstu í fimmta skiptið — sem er að sjálfsögðu jákvætt, en það þýðir þó að sú samanlögð fjárhæð sem ég þarf að leggja út fyrir prentun er svo há að fáir sjálfstæðir útgefendur, eins og ég, myndu ráða við hana.

via Saga eftirlifenda – Karolina Fund.

Listasprettur á laugardegi

Á laugardaginn næsta, 18.októrber kl. 16, kynna þær Halla Margrét Jóhannesdóttir, Jóhanna V. Þórhallsdóttir, Jónína Leósdóttir og Ólöf Ingólfsdóttir ljóð sín sögur og söngva. Þær hafa allar nýverið gefið út bækur og diska; Halla Margrét á útgáfufyrirtækið Nikku sem gaf nýverið út ljóðabók hennar 48 og bók Ólafar, Dagar og nætur í Buenos Aires, Forlagið gaf út bók Jónínu, Bara ef … og útgáfufyrirtækið Valgardi, gaf út geisladisk Jóhönnu, Söngvar á alvörutímum.

Þær stöllur verða í Anarkíu, Hamraborg 3, á laugardaginn kl. 16 og lesa og syngja, en léttar veitingar verða á boðstólunum.

Í Anarkíu er einnig sýning á verkum Helgu Ástvaldsdóttur og Jónasar Braga Jónassonar.

Ókeypis er inn, bæði á sýninguna og kynninguna.

via Listasprettur á laugardegi.

Útgáfupa-ha-hartí skáldsögunnar DRÓN e. Halldór Armand

Heyhó. Heyheyhó. Laugardagur, 25. okt, milli 17-19. Bókabúð Máls & Menningar í hjarta miðbæjarins. Frítt bús. Live-tónlist. Ný og spennandi skáldsaga með helluðu premise-i. Hver getur sagt nei?

Heimildir herma að þekkt andlit á heimsvísu hafi boðað komu sína. Novak Djokovic? Chelsea Clinton? Kærasta Edwards Snowden? Sannleikur eða lygasaga? Raunveruleiki eða uppspuni?

En um hvað er bókin??!! Er enginn káputexti hér, oder was, eitthvað info sem ég get hamsað í mig??!! Ég er tímabundinn aðili með emaila til að svara, næstum batteríslausan síma og reikning frá Nova sem ég skil ekki! Vektu áhuga minn ASAP eða þegiðu! Gaur, go away or make me a sandwich!

Hey, aðili. Aðili … komdu hérna. Leyfðu mér að taka utan um þig. Svona já. Alveg róleg/ur. Hérna er textinn. Var hérna allan tímann. Lestu þetta bara af yfirvegun.

Þessi bók er um heiminn sem þú lifir og hrærist í, þannig séð, eða nánar tiltekið …

„Þegar líkami Heiðrúnar Sólnes, efnilegustu knattspyrnukonu landsins, virðist geta spáð fyrir um dularfullar árásir dróna víða um heim óttast hún að hún sé að missa vitið. Angistin breytist í algjöran hrylling þegar Ísland verður fyrir árás.

Árásirnar eru þó aðeins eitt af mörgum vandamálum sem þessi viðkvæmi sumarstarfsmaður Reykjavíkurborgar stendur frammi fyrir; faðir hennar óttast að Kötlugos leggi samfélagið á hliðina, neyðarlegt myndband á netinu gæti kollvarpað framtíð hennar og í þokkabót er hún skotin í floksstjóranum sem reykir mentólsígarettur og elskar verslunarmiðstöðvar.

DRÓN er glæsilega skrifuð og óvenjuleg skáldaga, stútfull af óstöðvandi hugmyndaflugi, ferskum húmor og pælingum um tækni og mennsku, sannleika og firringu, en um leið þroskasaga unglings sem vill ekki lengur lúta fjarstýringu annarra.“

Já, það er ekkert annað. Hljómar eins og allur pakkinn.

via Útgáfupa-ha-hartí skáldsögunnar DRÓN e. Halldór Armand.

Margrét Örnólfsdóttir: Við skrifum handrit og allir hinir fá vinnu

En í Varsjá voru öll dýrin í skóginum vinir – sápuóperuhöfundur frá Írlandi skálaði við listrænt þenkjandi kvikmyndahandritshöfund frá Finnlandi – allir fundu einhverja snertifleti og almennt virtist fólk átta sig á að það væri að langmestu leiti að fást við það sama – að skrifa drama. Annað sem þjappar hópnum saman er sameiginlegur óvinur. Margir hafa inngróið horn í síðu framleiðenda vegna sárrar reynslu af lélegum samningum eða vanefndum en nú virðist þó sem sú óvild sé víkjandi þar sem hagsmunir höfunda og framleiðenda gegn nýjum og öflugri ógnvaldi fara að miklu leiti saman. Stærsta málefni kvikmyndageirans er að sjálfsögðu hið gjörbreytta landslag í dreifingu kvikmynda- og sjónvarpsefnis á netinu og það stríð þurfa allir eigendur höfundarréttavarins efnis að heyja í sameiningu.

Margrét Örnólfsdóttir skrifar via Við skrifum handrit og allir hinir fá vinnu | Klapptré.

Húmor / Amor á Lestrarhátíð – Bókmenntaborgin

Bókmenntaborgin og Söguhringur kvenna tóku höndum saman nú í byrjun október og efndu til ritsmiðju undir heitinu Húmor / Amor með skáldkonunni Angelu Rawlings. Smiðjan var á dagskrá Lestrarhátíðar í Bókmenntaborg 2014 – Tími fyrir sögu. Á annan tug kvenna tók þátt í þessari tveggja daga smiðju en þar var lagt upp með að skrifa smáprósa eða stutta texta út frá þemanu húmor / amor. Margar kvennanna eru af erlendum uppruna og voru textar því skrifaðir á fleiri tungumálum en íslensku.

Angela beitir nýstárlegum æfingum og aðferðum í ritsmiðjum, en hún hefur haldið fjölmargar slíkar bæði hér á Íslandi og erlendis. Hún notar t.d. alls kyns kveikjur úr umhverfinu, hljóðæfingar og leik að orðum, tungumálum og orðasamböndum.

via Húmor / Amor á Lestrarhátíð – Bókmenntaborgin.

Bann á torrentsíðum | Lappari

Það var gerð athugun á þessum málum í Noregi sem sýndu að frá árinu 2008 til 2012 magn “pirated copies” lækkaði gífurlega. Tónlist fór t.d. úr 1.2 milljarði sóttra skráa niður í rúmlega 200 milljónir á þessum 4 árum, eða um rúmlega 82% lækkun, á meðan var um 50% minna sótt af bíómyndum og sjónvarpsþáttum.

Einhverjir hafa bent á að í Noregi hafi verið sýndar auglýsingar gegn “online piracy” og telja að það sé líka drifkraftur á bakvið þessar lækkandi tölur, en hafa ber í huga að þessar auglýsingar voru í gangi frá 1999 til 2008 á meðan “online piracy” var á mikilli uppleið. Það sem gerist í kringum 2008 er að löglegar mynd- og tónlistarveitur, á borð við Spotify, Pandora, Netflix og Hulu, standa neitendum til boða og verða vinsælar.

via Lappari | Bann á torrentsíðum.

Forlagið sektað um 25 milljónir – DV

Taldi eftirlitið að Forlagið hefði brotið gegn þessum skilyrðum. Fólust brotin í því að Forlagið braut gegn banni við því að birta smásöluverð bóka og banni við því að veita bóksölum afslætti sem fælu í sér óeðlilega mismunun Forlagsins á milli þeirra. Skilyrðum þessum var meðal annars ætlað að tryggja að Forlagið myndi ekki raska samkeppni í endursölu á bókum. Samkeppniseftirlitið lagði 25 milljóna króna stjórnvaldssekt á Forlagið vegna þessara brota.

via Forlagið sektað um 25 milljónir – DV.

Viðskiptavinir Vodafone og Hringdu fá ekki að nota Deildu og PirateBay vegna lögbanns – DV

STEF, Samband tónskálda og eigenda flutningsréttar, fór fram á lögbannið. Í úrskurði héraðsdóms segir að aðalinntak höfundaréttar sé einkaréttur höfundar til að gera eintök af verki sínu og birta það. Starfsemi umræddra vefsvæða vegi gegn þessum grundvallarrétti. Þótt vefsvæðin hafi verið opin um skeið liggi ekki annað fyrir en að notkun og dreifing hins höfundavarða efnis standi enn yfir og nýtt efni sé sífellt að koma inn. Verði því fallist á það með sóknaraðila að brotin séu yfirvofandi í skilningi laga.

via Viðskiptavinir Vodafone og Hringdu fá ekki að nota Deildu og PirateBay vegna lögbanns – DV.

Höfundakvöld: Ármann og Guðrún Eva

Húsráð Gunnarshúss mun standa fyrir vikulegum Höfundakvöldum í Gunnarshúsi fram að jólum. Á hverju fimmtudagskvöldi mæta tveir höfundar og spjalla um bækur sínar, lesa aðeins úr þeim, og síðan gefst áhorfendum kostur á að spyrja líka. Meiningin er að lyfta jólabókavertíðinni aðeins upp úr fari hinna hefðbundnu upplestrarkvölda, og gefa hverri bók og hevrjum höfundi meiri tíma. Kvöldröðin fer af stað þann 16. okt kl. 20.00 enn þá mæta þau Guðrún Eva Mínervudóttir og Ármann Jakobsson og svara spurningum Arndísar Þórarinsdóttur um væntanlegar bækur sínar, skáldsöguna Englaryk (GEM) og barnabókina Síðasti galdrameistarinn (ÁJ). Allir velkomnir á meðan stólar leyfa, aðgangur 500 kr.

via Höfundakvöld: Ármann og Guðrún Eva.

Hamskiptin með augum blaðamanns – Landsbankinn

Að mati Inga var Björgólfur Guðmundsson táknmynd hins glæsta og gjafmilda auðmanns á Íslandi á árunum fyrir hrun. Ingi fjallar í bókinni um það hvernig fjárstuðningur við listir geti hugsanlega haft áhrif á listamenn eins og tekið var dæmi um þegar Björgólfur Guðmundsson vildi ekki opna Klink og Bank. Einnig hafi komið fram misvísandi skilaboð um það hvort og hversu mikil áhrif Landsbankans voru á listamenn innan Klink og Bank. Í bókinni er fjallað um aðkomu og sjónarmið þeirra bræðra Snorra og Ásmundar Ásmundarsona í því máli. Allt mjög athyglisvert og ekki síst að lesa ritgerð Hildar Jörundsdóttur til BA prófs á hugvísindasviði HÍ árið 2011, sem ég „googlaði“. Þar er fjallað um pólitískt framboð listamannsins Snorra sem gjörning.

Þorkell Sigurlaugsson skrifar um Hamskiptin eftir Inga Frey Vilhjálmsson via Hamskiptin með augum blaðamanns – Landsbankinn.

Jólagjöfin sem passar ekki undir tré | Kvennablaðið

En við erum þó heppin því íslensk höfundalög hafa að geyma 19. grein, sem leyfir safninu að búa til hljóðbækur handa þessum hópi án frekari málalenginga varðandi höfunda og útgefendur. Sumir rithöfundar eru æfir yfir þessari undanþágu og það er svo vel hægt að skilja það en það sem vegur mun þyngra að mínu mati eru almenn mannréttindi og jafnræði. Ef þessi undanþága væri ekki í gildi er hætt við að heldur fátæklegt yrði um að litast á bókakosti safnsins. Á sama tíma er safnið undir sívökulu eftirliti hagsmunaðila höfundarréttar og útgefenda.

via Jólagjöfin sem passar ekki undir tré | Kvennablaðið.

Maðurinn sem hataði börn – Fáránleiki og hárbeitt ádeila

Bókin er sneisafull af hárbeittri ádeilu á samfélag okkar. Blanda af léttri háðsádeilu og harðri gagnrýni á samfélagslega rétthugsun, eða öllu heldur ríkjandi skort á henni.

Höfundur velur sögumanni sínum sjónarhorn innflytjanda. Þannig fær ákveðinn minnihlutahópur samfélagsins rödd, hópur sem gjarnan hefur sætt fordómum. Með því að segja söguna út frá sjónarhorni Sylveks varpar höfundur auk þess ljósi á samfélag okkar, sem er okkur svo kunnugt en sögumanni framandi og furðulegt. Lesandinn nær miklu frekar tengingu við aðalpersónuna heldur en samfélagið sem byggt er á íslenskum samtíma. Það er spillt og nokkuð ógeðslegt.

via Vísir – Fáránleiki og hárbeitt ádeila.

Furðusagnasmiðjur Emils Hjörvars að hefjast

Bókmenntaborgin býður upp á furðusagnasmiðjur með rithöfundinum og bókmenntafræðingnum Emil Hjörvari Petersen á Lestrarhátíð í Bókmenntaborg 2014, en hún er nú haldin í þriðja sinn undir heitinu Tími fyrir sögu. Emil hefur þegar haldið þrjá opna fyrirlestra um furðusögur en nú er komið að því að áhugasamir geti spreytt sig á því að skrifa sínar eigin sögur.

via Vísir – Furðusagnasmiðjur Emils Hjörvars að hefjast.

RIFF: Skortur og angist

Sjónarhornið er oft óvenjulegt þar sem andlit, eyra eða háls eru til dæmis í nærmynd. Stundum er myndin úr fókus og reglulega koma rammar sem eru eins og undurfögur myndverk. Klippingar eru oft óvæntar og hljóðheimurinn er kafli út af fyrir sig. Drungaleg hljóðin magna upp áhrifin, ýta undir tilfinningar og túlkun á hugarástandi persónanna. Leikkonurnar standa sig allar með prýði í túlkun sinni á angist og harmi skortsins.

Skorturinn bæði áhugaverð og falleg mynd.

Sigurlín Bjarney skrifar via RIFF: Skortur og angist.