Kristín Svava (f. 1985) er sagnfræðingur og fyrrum póstberi úr vesturbænum. Hún hefur gefið út bækurnar Blótgælur (2007), Dr. Usli (2009) , Skrælingjasýningin (2011), Stormviðvörun (2015) og vinnur nú að ritsafni um klám.
Nýlenduherrarnir
Það gengu svo viðkunnanlegir Danir á undan mér niður götuna (já þeir eru til) á leiðinni heim með sultuna og rjómann. Þeir reyktu pípu og gættu þess að ganga ekki á hjólastígnum. Þeir voru í fötum sem gáfu til kynna að þeir væru vanir að fara ferða sinna fótgangandi, báðir í uppbrettum gallabuxum með bakpoka úr segldúk. Ég velti fyrir mér hvort þeir væru elskhugar eða vinir. Þeir snertust aðeins einu sinni, þegar annar þeirra rann til í hálkunni og greip í hinn og hló. Þegar við gengum framhjá húsinu mínu datt mér í hug að segja „undskyld“ og bjóða þeim inn. Mér datt í hug að segja „det er bolledag her i Island i dag“ og svo myndum við elskast öll þrjú fram á nótt.
