Atli Sigþórsson (f. 1983) er norðlenskur orðfimleikamaður sem betur er þekktur undir listamannsnafninu Kött Grá Pje. Hann hefur vakið umtalsverða athygli síðustu misseri, bæði á eigin vegum með laginu Aheybaró, en einnig sem gestur í hópi annarra rappara, t.d. hinu fræga Brennum allt með Úlfi Úlfi. Á næstu vikum birtist fyrsta breiðskífa Atla – sem og hans fyrsta bók. Atli á kött sem er fyrirferðarmikill á samfélagsmiðlum. Hún heitir Kālikā og tortímir illum öflum.
langhlaup
Einlægt sjálfshatur er langhlaup.
flugeðlan
Á svölum blokkaríbúðar í Vesturbænum hefur vængjuð ófreskja aftan úr grárri forneskju gert sér bæli. Þaðan herjar hún á leikvelli hverfisins. Sækir sér börn í svanginn. Engum dettur í hug að lyfta litla fingri vegna þess, því nútímafólk hefur um svo margt annað og alvarlegra að hugsa en forsögulegar vængjaðar ófreskjur.
þvottavélin sem enn vindur
Í annarri þvottavélinni niðri í kjallara, þeirri sem ennþá vindur almennilega þegar hún er stillt á suðu, býr tröll. Það borðar ekki börn eða nauðgar bændum heldur hreytir ónotum í þá íbúa sem hætta sér þangað niður. Það spyr hluta á borð við: „Hví þarf maður á þínum aldri að nota skitið þvottahús? Ættirðu ekki að eiga eigin þvottavél? Hvenær ætlarðu eiginlega að koma undir þig fótunum? Og systkini þín svona efnilegt ungt fólk. Æ, æ og ó og romm-tomm-tomm-í tromlunni!“ Enginn kemur ánægður með sjálfan sig eða þvottinn sinn neðan úr kjallara. Þótt vélin sem slík standi fyrir sínu og vel það.
Birtist upprunalega 30. júní 2016.
