Þrjú ljóð úr bókinni Hamingjan leit við og beit mig eftir Elínu Eddu.

Læknir

Áttu einhver lyf
sem breyta mér í
rólegan hlyn
eða kaktus
sem er umlukinn tónlist?

Eða er það eitthvað
sem tíminn breytir mér í
smátt og smátt?

Sólmyrkvi

Mér var sagt
að það væri von á sólmyrkva í dag.
Sólmyrkva sem liti út
eins og samþjöppuð hamingja.
Svo skínandi, skínandi björt
fyrir óreynd augu.
Mér var sagt að líta ekki upp.
Þriðjungur fær varanlegan augnskaða.
Hamingjan leit við á himninum í dag
en ég leit ekki upp.

Ég stóð fast í fæturna og dró fyrir
en hamingjan náði að narta í augnbotninn
gegnum rifuna á gluggatjöldunum.

Hamingjan leit við á himininum í dag.

Hamingjan leit við
og beit mig
í dag.

Stefnuleit

Kjarni epla
er harður.
Kjarni lífsins
er harðari.
Þess vegna
á að bíta laust í kring
og mæta hörðu með mýkt.

Tennur vita
margt.

Þær kenna mér
eitt og annað:

Bíta saman.

Stefnan er
einhvers staðar
á milli okkar.