Samlesnar predikanir – loftsöngur eftir Hauk Ingvarsson

 

nothæf rothögg fyrir vanhæf fyrirtæki
og þrothæf tækifæri fyrir litlar stórar og meðalstórar gjaldskyldur

ráðstjórnin bindur vonir við að kjallaramellur gefi karamellur
svo gjaldeyrin börn fái veð í stígvélum og pollagöllum
handa samþrota félagi

já nú þarf að slá um sig herra ráði
svo ekki þurfi að gjaldborga
lán slegna skjaldborg lánleysingja
og hámark einn ávöxtur
fyrir gjaldburð á framliðnum hag

já nú þarf nagandi sæld
fyrir sambrýnda örþjóð
sem syngur um skuld sína
því öll hennar titrandi blóm
um ókomnar eilífðir
verða étin af fé.