AUGNSVIPUR

augnsvipur
reiddar til höggs

og bráðum ætti að heyrast í þeim
hviss hviss

bíddu aðeins lengur
það eru fjögur skref í kaffipásu

fjögur skref fyrir mínútukarlinn
tvö hundruð fyrir Sekúndu

stofan er of björt fyrir janúarmorgun

svefninn nuggast ekki úr kennaranum
fyrr en hún áttar sig á stírunum

pískur
í lofti

einhver hefur tússað
jing og jang á næsta borð

munurinn á myndhverfingu
og viðlíkingu, segir kennarinn

munurinn er að vera asni og asnaleg
hviss hviss

bíddu aðeins lengur

Sekúnda fetar sig að pásunni
þú í kringum myllusteininn

Í SANDKASSANUM

við sjúgum sígaretturnar
eins og vaxliti

við erum í mömmó

fallegi strákurinn er með rauðan tóbaksklút
fallega stúlkan er óræð yfirlitum

við sláum skjaldborg um þau
til að hlæja betur

kannski kyssast þau í kvöld
kannski fer hún að gráta á mánudaginn

þarna kemur rektorinn
með bleikan miða

kominn til að klukka okkur
kominn til að sekta

við skömmum hann
við erum í mömmó

bannað að koma hingað, litli rektor
hér er ó ó

við réttum honum sneið
af stubbum og tjöru og sandi

hér er kaka
sem er bannað að borða

ó ó, en þú mátt segja
takk fyrir og fara

Sandkassinn er fullur
segjum við og blásum út í loftið

Sandkassinn er bara
fyrir fullorðna fólkið

Fríða Ísberg er ein af Svikaskáldunum sem gáfu út Ég er ekki að rétta upp hönd. Slitförin ný ljóðabók eftir Fríðu Ísberg kemur út hjá Partus brátt.