GARÐURINN MANNS

maður verður að rækta garðinn sinn

hafa trén svo tignarleg að þau teygi
sig yfir í næstu garða og skyggi
á útsýni nágrannanna

fá meindýraeyði
(þann dýrasta = blóðþyrstasta)
svo maður losni við rottur

leigja út herbergið í kjallaranum
til að safna fyrir heitum potti
og trampólíni

snöggslá grasið
spreða þykkum áburði á runnana
ráða ódýran útlending til að snyrta blómin

setja skilti:
Einkalóð, óviðkomandi
bannaður aðgangur

maður verður að rækta garðinn sinn

hringja óðamála í lögguna í hvert skipti sem flissandi unglingar
læðast berfættir yfir snöggslegið grasið
á heitri sumarnóttu

skrá sig á byssunámskeið, fá
byssuleyfi, sofa með byssuna
í seilingarfæri

stækka bílskúrinn þó að það bitni
á túninu við innkeyrsluna

maður verður að rækta garðinn sinn

maður verður að rækta garðinn sinn
þangað til hann er orðinn besti garðurinn
í öllu hverfinu, í allri borginni, á öllu landinu

kaupa þá fleiri hús og lóðir
og rækta fleiri garða

maður verður að rækta garðana sína

rækta bestu garða í heimi

eiga hús á Spáni
og í Flórída
og rækta þar garðana sína
og setja upp fleiri skilti:

Einkalóð

eiga reiðan hund
í görðunum – marga reiða hunda
sem gelta að ókunnugum

eiga ótal garða úti um allan heim
með ótal reiðum hundum
sem gelta á alla sem ganga hjá