Þú hallar þér upp að konu þinni
í nærfataverslun á Laugaveginum á Tenerife:

Þið eruð stillimynd í óreiðu glaðværra sólbrenndra andlita.
Veitið hvor annarri skjól fyrir krefjandi tilboðum.

Svo, skyndilega
er hún hrifin frá þér.
Hverfur
eins og bæn

inn í vímu hins ágenga eðlileika.

Æðir um rekkana
einbeitt á svip
stansar svo snarlega
heldur á fjalli af þunnum nærbrókum
og segir hvassri röddu
í návist annarra ferðafélaga:

Kauptu nóg af þessum
svo hendirðu
obbanum af gömlu nærbuxunum þínum
þegar við komum heim.

Ljóðið er úr bókinni Fræ sem frjóvga myrkrið sem hlaut Maístjörnuna 2019.